Psa 8 | WSK | STEP | O Kaem, ni anananga Kari Biya, ali sor suen la te ni la nip kualala biya! Aliti se taiti kuali ago la ni nip patowasan.

Psalms 8

Kaem ko nup mu kualala biya ko den

(Devit ko wur bo)

1 O Kaem, ni anananga Kari Biya,

ali sor suen la te ni la nip kualala biya!

Aliti se taiti kuali ago la ni nip patowasan.

2 Kuriang gotektek se kuriang amin te ago la nip patowasan.

Ni aragaragar sokel ago la bagasam.

Se sikina ni ko ko nongomang magoso, se kerak kagermonko kaesan, mu ni nomoke kalosam.

3 Tom ani taiti kuali loagasam,

ale sige baras ni nungem ale nunga kuwim kuwim te awurem mu arigisam,

mu ani iwita angamin tugusam:

4 O Kaem, ana kariimet yam, bare awuk se ni nanga bitarsam, nanga sinar tasam?

5 Ni ensel alo nunup biya bita nungarem,

ale nobowa ningi ana nainip nikinang karogo nanga beterem.

6 Ni mel suen biya nungem bare ana bitarnakko balem,

ale mel suen biya ana nabowa ningi awurem:

7 sipsip se bulmakau, se buruk nio madar,

8 se taiti kuali inanganang, se gagi ningi wal kasili,

mu ni am mel suen biya ana nabowa ningi awu saperem.

9 O Kaem, ni anananga Kari Biya,

ali sor suen la te ni la nip kualala biya!